Grantiau Rhwydweithiau Diwylliant Ymchwil 2026
Dyddiadau Allweddol
Arianwyr: MEDR a Cymdeithas Ddysgedig Cymru
Mwyafswm gwerth y grant: £3,000
Nifer y grantiau sydd ar gael: 13
Ceisiadau’n agor: 5 Ionawr 2026
Ceisiadau’n cau: 23 Ionawr 2026, 4pm
Yn yr hinsawdd ariannu Addysg Uwch bresennol, mae cyllid sefydliadol ar gyfer Rhwydweithiau Diwylliant Ymchwil yn gynyddol gyfyngedig. O ganlyniad, mae llawer o rwydweithiau a oedd yn ganolog i gryfhau diwylliannau ymchwil ar lawr gwlad bellach heb gefnogaeth ac mewn perygl o gau. Nod Grantiau Rhwydweithiau Diwylliant Ymchwil Cymdeithas Ddysgedig Cymru yw mynd i’r afael â’r her hon drwy ddarparu hyd at £3,000 i gefnogi rhwydweithiau ymchwilwyr presennol neu sy’n dod i’r amlwg yng Nghymru i barhau i gynnig gweithgareddau cydweithio hanfodol o ran diwylliant ymchwil. Rydym yn falch iawn o gael cydweithio â Medr, y Comisiwn Addysg Drydyddol ac Ymchwil, wrth lansio’r cynllun grant newydd hwn.
Beth yw rhwydwaith diwylliant ymchwil?
Gellir deall diwylliant ymchwil yn fras fel y gwerthoedd, yr ymddygiadau a’r gefnogaeth strwythurol ar y cyd o fewn prifysgolion, sefydliadau cyhoeddus, neu gyrff ymchwil trydydd sector sy’n dylanwadu ar sut mae ymchwil yn cael ei chynnal, ei phrofi a’i gwerthfawrogi gan unigolion a chymunedau. At ddibenion y grant hwn, rydym yn diffinio Rhwydwaith Diwylliant Ymchwil fel grŵp o ymchwilwyr sy’n dod ynghyd i fynd i’r afael â her neu ddiffyg penodol o fewn y tirlun ymchwil. Gall Rhwydweithiau Diwylliant Ymchwil gymryd sawl ffurf; mae enghreifftiau’n cynnwys rhwydweithiau sy’n canolbwyntio ar heriau a wynebir mewn cyfnod penodol o ran gyrfa, dileu rhwystrau i ymchwilwyr â nodweddion gwarchodedig, a chymunedau sydd wedi’u trefnu o amgylch disgyblaethau penodol neu ddiddordebau ymchwil trawsddisgyblaethol.
Gall rhwydweithiau ymchwil weithredu o fewn un sefydliad neu ar draws sefydliadau. Gallant fod wedi’u seilio mewn un ddisgyblaeth academaidd neu fod yn rhyngddisgyblaethol.
Pwy all ymgeisio?
Gall ymchwilwyr neu grwpiau o ymchwilwyr sy’n gweithio yng Nghymru gyflwyno ceisiadau. Er nad oes angen i bob aelod o’r Rhwydwaith fod yn gweithio yng Nghymru, rhaid i ymgeiswyr arweiniol a’r rhai sy’n gwneud cais am grant:
- fod yn academydd llawn amser neu ran-amser sy’n cael ei gyflogi gan sefydliad Addysg Uwch;
- fod yn staff llawn amser neu ran-amser sy’n galluogi ymchwil yn y sector cyhoeddus neu’r trydydd sector sydd ag ymrwymiad amlwg i ymchwil o fewn y sefydliad dan sylw. Gellir diffinio staff sy’n galluogi ymchwil fel y rhai sy’n cefnogi datblygu ymchwil yn ogystal ag ymchwilwyr annibynnol neu llawrydd.
Rhaid i ymgeiswyr arweiniol fod â chontract, naill ai dros dro neu barhaol, yn eu sefydliad cyflogi, sy’n cwmpasu cyfnod llawn y grant.
Bydd cynigion yn cael eu hasesu gan banel a benodir gan Gymdeithas Ddysgedig Cymru, a fydd yn dod i gonsensws wrth benderfynu pa gynigion sy’n llwyddiannus. Bydd ceisiadau’n cael eu hasesu yn ôl y meini prawf a restrir yn yr adran ‘Beth rydym yn chwilio amdano’. Efallai y gofynnir i ymgeiswyr am ragor o wybodaeth cyn cadarnhau bod grant yn llwyddiannus.
Noder mai dim ond un Grant Rhwydwaith Ymchwil a Diwylliant Cymdeithas Ddysgedig Cymru y gellir ei ddal, neu wneud cais amdano, ar unrhyw un adeg.
Beth rydym yn chwilio amdano
Rydym yn awyddus i ariannu gweithgareddau sy’n dod ag ymchwilwyr ynghyd i fynd i’r afael â her neu ddiffyg diwylliant ymchwil o fewn y tirlun ymchwil, boed ar draws sectorau neu o fewn disgyblaeth benodol, cam gyrfa, neu nodwedd warchodedig. Dylai gweithgareddau arfaethedig gyfrannu at newid cadarnhaol mewn diwylliant ymchwil neu ddangos effaith o fewn a thu hwnt i’r byd academaidd, gan gyfoethogi ein dealltwriaeth o ddiwylliant ymchwil ar draws sefydliadau o safbwynt cymunedau ymchwilwyr ar lawr gwlad.
Bydd gweithgareddau a ariennir yn canolbwyntio’n bennaf ar ddigwyddiadau a gallant gynnwys cynadleddau, gweithdai, trafodaethau bord gron, enciliadau ysgrifennu, a chyfleoedd rhwydweithio ffurfiol ac anffurfiol.
Anogir ymgeiswyr i archwilio allbynnau creadigol a gweledol fel ffordd o rannu’r wybodaeth a gynhyrchir trwy eu gweithgareddau. Gallai’r allbynnau hyn gynnwys darn ‘gwersi a ddysgwyd’, cyfres blog, cylchgrawn, ffeithluniau, posteri digidol, penodau podlediad neu fideos byr. Dylai allbynnau sicrhau bod y mewnwelediadau a gynhyrchir yn hygyrch i gynulleidfaoedd amrywiol ac anacademaidd.
Cyn cyflwyno eich cais, gwnewch yn siŵr eich bod yn darllen y dogfennau canllaw canlynol yn ofalus:
Rhaid cyflwyno ceisiadau drwy ein ffurflen ar-lein, y gellir ei chyrchu drwy’r ddolen isod. Y dyddiad cau i gyflwyno cais yw 23 Ionawr 2026 am 4pm. Ni fydd ceisiadau a dderbynnir ar ôl y dyddiad hwn yn cael eu hystyried.
