Beth mae bod yn Gymrawd yn ei olygu?
Mae Cymrodoriaeth Cymdeithas Ddysgedig Cymru yn wahanol i aelodaeth o gorff proffesiynol. Fel Academi Genedlaethol Cymru, rydym yn elusen a chanddi Gymrodyr sydd wedi’u dewis drwy broses graffu drylwyr fel arweinwyr yn eu maes. Mae ganddynt oll un diben cyffredin, sef rhoi rhywbeth yn ôl i Gymru.
Mae ein 700 o Gymrodyr yn cwmpasu pob maes gwybodaeth ac yn cynnwys arweinwyr ar draws sawl sector, gan gynnwys y byd academaidd, diwydiant, bywyd cyhoeddus a’r trydydd sector. Mae eu meysydd diddordeb yn rhychwantu’r gwyddorau, y dyniaethau, y celfyddydau a gwasanaethau cyhoeddus.
Mae pobl eisiau bod yn Gymrodyr y Gymdeithas am amrywiaeth o resymau sy’n cynnwys:
Cyfrannu at hyrwyddo gwybodaeth i Gymru
Ein diben elusennol yw hyrwyddo gwybodaeth i gyfrannu at ddatblygiad gwyddonol, diwylliannol, cymdeithasol, amgylcheddol ac economaidd yng Nghymru a thu hwnt. Cyfraniad cydweithredol yw’r gymrodoriaeth tuag at y diben elusennol hwnnw, a’r effaith y mae’n ei greu.
Cydnabyddiaeth gan gymheiriaid
Mae’r broses o ethol yn sefydlu rhagoriaeth unigolyn o fewn ei faes. Dangosir y lefel hon o gydnabyddiaeth gan gymheiriaid drwy osod y llythrennau ‘FLSW’ ar ôl enw’r unigolyn, sy’n cydnabod dylanwad yr unigolyn hwnnw.
Rhannu arbenigedd
Mae cymrodoriaeth yn cynnig cyfleoedd i ymgysylltu â llunwyr penderfyniadau a pholisi Cymru drwy ymchwil, arloesi a chyfnewid gwybodaeth.
Ymuno â chymuned unigryw
Mae bod yn gymrawd, o fewn cymuned sydd ag ystod eang o arbenigedd a phrofiad, yn dod â chi i gysylltiad â phobl na fyddech chi fel arfer yn dod ar eu traws, gan greu partneriaethau cynhyrchiol ac annisgwyl yn aml. Bydd cymrodyr yn dod ynghyd mewn amrywiaeth o ddigwyddiadau a gweithgareddau (yn y cnawd ac yn rhithiol) i rwydweithio â chydweithio er budd Cymru.
Datblygiad proffesiynol
Gall cymrodoriaeth roi mynediad ichi at gyfleoedd newydd a amlygir drwy’r Gymdeithas, neu drwy gysylltiadau a wneir â Chymrodyr eraill sy’n arwain at gyfleoedd datblygu proffesiynol y tu hwnt i’r cyffredin.
