Cynllun Symudedd Newydd: Cynorthwyo Ymchwilwyr Gyrfa Cynnar i Feithrin Ymchwil Cydweithredol rhwng Cymru ac Iwerddon

Mae gan waith ymchwil cydweithredol rhwng Cymru ac Iwerddon rôl bwysig i’w chwarae wrth fynd i’r afael â chyfleoedd a heriau cyffredin, ac mae ymchwilwyr gyrfa cynnar yn allweddol i feithrin y cysylltiadau hyn. I hwyluso hyn, mae Cynllun Symudedd Ymchwilwyr Gyrfa Cynnar (YGC) rhwng Cymru ac Iwerddon yn darparu cyfleoedd newydd i ymchwilwyr yng Nghymru i ddatblygu cydweithio rhyngwladol, ehangu eu rhwydweithiau, a chryfhau eu gyrfaoedd ymchwil. Mae’r Llywodraeth Cymru yn ariannu’r cynllun trwy’r Datganiad ar y Cyd Cymru-Iwerddon 2030, a Chymdeithas Ddysgedig Cymru (CDdC) sy’n ei weithredu. 

Mae’r cynllun yn cynnig grantiau o hyd at £2,000 i hwyluso ymweliadau ymchwil byr i Iwerddon. Mae hyn yn caniatáu i ymchwilwyr ar gyfnod cynnar yn eu gyrfa gyflawni gwaith ymchwil sylfaenol, cyrchu arbenigedd, offer neu hyfforddiant arbenigol, a sefydlu partneriaethau sy’n gallu arwain at brosiectau cydweithredol â’r posibilrwydd o ddenu cyllid rhyngwladol yn y dyfodol.  

Mae gwaith ymchwil ac arloesi wrth galon y berthynas hirsefydlog rhwng Cymru ac Iwerddon. Mae’r cynllun symudedd yn rhan o ymrwymiad ehangach i gryfhau’r cysylltiad rhwng y ddwy wlad, a datblygu uchelgeisiau Datganiad ar y Cyd Cymru-Iwerddon 2030. 

“Mae partneriaethau rhyngwladol cadarn yn hanfodol i ddatblygu gwaith ymchwil, arloesi a chyfnewid gwybodaeth,” meddai’r Athro Siwan Davies, Dirprwy Is-Ganghellor ar gyfer Ymchwil, Arloesi a Menter ym Mhrifysgol Abertawe a Chadeirydd Grŵp Cynghori CDdC ar gyfer Datblygu Ymchwilwyr.

“Trwy gynorthwyo ymchwilwyr ar gam cynnar yn eu gyrfa i ddatblygu gwaith cydweithredol newydd a chyrchu arbenigedd yn Iwerddon, mae’r cynllun hyn yn helpu i osod y sylfeini ar gyfer partneriaethau academaidd, polisi ac arloesi hirdymor, yn rhan o’n huchelgais i gryfhau Cynhrair yr Academiau Celtaidd. 

“Mae Cymdeithas Ddysgedig Cymru’n falch o gefnogi mentrau sy’n cryfhau’r cysylltiad rhwng Cymru ac Iwerddon, gan greu cyfleoedd sy’n gallu sbarduno buddion parhaus y naill ochr a’r llall i Fôr Iwerddon.” 

Mae ceisiadau wedi agor ar gyfer Cynllun Symudedd Ymchwilwyr Gyrfa Cynnar Cymru-Iwerddon 2026-2027, gan roi cyfle i ymchwilwyr ar gyfnod cynnar yn eu gyrfa gymryd y cam nesaf a chyfrannu at gysylltiadau ymchwil cryfach rhwng Cymru ac Iwerddon.  

Dysgwch ragor a gwnewch gais: Cynllun Symudedd YGC Cymru-Iwerddon – The Learned Society of Wales