Lansio arolwg i ddeall anghenion ymchwilwyr gyrfa gynnar a chanol gyrfa ledled Cymru

Mae ecosystem ymchwil Cymru yn amrywiol. Mae’n cwmpasu ystod eang o ddisgyblaethau, sefydliadau a llwybrau gyrfa, gan gynnwys prifysgolion, sefydliadau cyhoeddus a phreifat, a lleoliadau cymunedol a thrydydd sector. Mae sylw sylweddol wedi’i roi i Ymchwilwyr Gyrfa Gynnar. Fodd bynnag, nid yw anghenion a hunaniaethau penodol Ymchwilwyr Canol Gyrfa yn cael eu harchwilio’n ddigonol o hyd, gan gynnwys i ba raddau y mae’r rhain yn gwahaniaethu o rai “Ymchwilwyr Sefydledig” fel yr haen nesaf i fyny. Mae Ymchwilwyr Gyrfa Gynnar ac Ymchwilwyr Canol Gyrfa yn hanfodol i gynaliadwyedd a dilyniant ymchwil yng Nghymru. 

Rydym wedi lansio arolwg ledled Cymru i edrych ar sut mae ymchwilwyr yn hunan-uniaethu ar y camau gyrfa hyn, yr heriau maent yn eu hwynebu, a’r bylchau mewn cymorth hyfforddiant a datblygu. Mae’r arolwg ar agor i ymchwilwyr gyrfa gynnar a chanol gyrfa, yn ogystal ag eraill sy’n ymgymryd ag ymchwil neu waith sy’n gysylltiedig ag ymchwil ar hyd a lled Cymru. Rydym yn awyddus i gofnodi ystod eang o brofiadau ar draws sectorau, disgyblaethau, lleoliadau cyflogaeth, camau gyrfa a chefndiroedd. Mae hyn yn cynnwys lleisiau a allai fod yn llai amlwg mewn sgyrsiau sydd eisoes yn bodoli ynghylch datblygiad ymchwilwyr. 

Mae’r arolwg yn gofyn: 

• sut mae pobl yn deall eu cam gyrfa eu hunain 
• eu profiadau o ddatblygu gyrfa ymchwil, 
• y cyfleoedd a’r cymorth sydd ar gael iddynt, 
• y rhwystrau a’r heriau y maent yn eu hwynebu, 
• a’r hyn maen nhw’n meddwl fyddai’n gwneud gwahaniaeth ystyrlon. 

Bydd y canfyddiadau’n cyfrannu at dystiolaeth fwy cadarn yn seiliedig ar brofiadau ac anghenion ymchwilwyr ar hyd a lled Cymru. Bydd yn sail i argymhellion ymarferol ar gyfer ymarfer, darpariaeth a pholisi datblygu ymchwilwyr y dyfodol. Byddant hefyd yn ein helpu i fireinio’r ymyriadau a’r mentrau rydym yn eu cynnal drwy ein Rhaglen Datblygu Ymchwilwyr, ac yn nodi meysydd ar gyfer gweithredu cydweithredol posibl gyda rhanddeiliaid yng Nghymru a thu hwnt, er mwyn hyrwyddo ecosystem ymchwil iach, cynhwysol a chynaliadwy yng Nghymru. 

Mae cymryd rhan yn wirfoddol. Gall pawb sy’n cwblhau’r arolwg ddewis rhoi eu henwau ymlaen am un o’r pum gwobr o £50. Cynhelir hyn ar wahân, felly nid yw manylion cyswllt byth yn cael eu cysylltu ag ymatebion i arolygon. 

“Gall eich llais chi helpu i lywio dyfodol ymchwil yng Nghymru,” meddai Dr Barbara Ibinarriaga Soltero, Rheolwr Rhaglen ar gyfer Datblygu Ymchwilwyr. 

“P’un a ydych yn Ymchwilydd Gyrfa Gynnar neu’n Ymchwilydd Canol Gyrfa, neu’n ymgymryd ag ymchwil, mae eich profiadau’n bwysig. Drwy gymryd rhan yn yr arolwg hwn, neu ei rannu â chydweithwyr, byddwch yn helpu i greu’r dystiolaeth sydd ei hangen i greu gwell cyfleoedd, cefnogaeth gryfach, a sefyllfa gyrfaoedd ymchwil mwy cynaliadwy ar gyfer ymchwilwyr presennol a’r dyfodol ar hyd a lled Cymru.” 

Mae eich profiadau a’ch safbwyntiau’n bwysig ar gyfer yr ymchwil hwn, ac rydym yn eich annog i’w rhannu drwy gwblhau’r arolwg. Rydym hefyd yn cydnabod nad yw arolwg efallai yn ffordd hygyrch neu addas i bawb gyfrannu. Pe bai’n well gennych gymryd rhan mewn modd gwahanol, cysylltwch â Zaina Aljumma i drafod dewisiadau eraill. 

Bydd cyfle hefyd i ymuno â grŵp ffocws i drafod y canlyniadau sy’n dod i’r amlwg ac i’n helpu ni i sicrhau eu bod yn adlewyrchu profiadau ymchwilwyr. Os hoffech gymryd rhan, llenwch y ffurflen fer hon i gofrestru eich diddordeb. 

Bydd yr arolwg yn cau ar 4ydd Rhagfyr 2026. Gallwch gwblhau’r arolwg drwy glicio yma.

Os oes gennych unrhyw gwestiynau ynghylch yr arolwg, cysylltwch â ni ar researcherdevelopment@lsw.wales.ac.uk